ភ្នំពេញ: “មហោស្រពបង្ហើរខ្លែងខ្មែរខួបទី២០” ត្រូវបានរៀបចំឡើងនៅទីលានមុខសាលមហោ ស្រពកោះពេជ្រ នាព្រឹកថ្ងៃទី ១៤ ខែធ្នូ ឆ្នាំ ២០១៧ ក្នុងព្រឹត្តការណ៍នេះមានកីឡាករបង្ហើរខ្លែង មកពីខេត្តក្រុងចំនួន១៧ សិស្ស, និសិ្សត និង ប្រជាជនចូលរួមយ៉ាងច្រើនកុះករផងដែរ។
កម្មវិធីនេះត្រូវបានចូលរួមក្រោមអធិបតីភាព ឯកឧត្តម សំរាំង កំសាន្ត រដ្ឋលេខាធិការក្រសួងវប្បធម៌ និងវិចិត្រសីល្បះ និង ទទួលបន្ទុកទំនាក់ទំនងអន្តរជាតិ ការងារអាស៊ាន និង បំផុសចលនាស្នាដៃថ្មីលើវិស័យវប្បធម៌។
នៅក្នុងការប្រកួតបង្ហើរខ្លែងគេបានបែងចែកជាពីរប្រភេទគឺ ប្រភេទទីមួយ ជាការប្រកួតបង្ហើរខ្លែងឯក មានចំនួន១៧ខ្លែងតំណាងអោយ១៧ខេត្តក្រុង មានបេក្ខជន បេក្ខនារី ៣៤នាក់។ និងប្រភេទទី២ ជាការប្រកួតបង្ហើរខ្លែងស្វៃរិន (ជាខ្លែងកែច្នៃ) ដែលមាន១៧ខ្លែងដូចគ្នា និងបេក្ខជន បេក្ខនារី ៣៤នាក់។
ចំពោះការដាក់ពិន្ទុ គឺគណះកម្មាការបច្ចេកទេសត្រួតពិនិត្យទៅលើ៣ចំនុច៖
ទី១៖ សង្កេតទៅលើភាពល្អរបស់ខ្លែងនៅពេល (បង្ហោះឡើង កំពុងហើរ និងពេលចុះ),
ទី២៖ មើលទៅលើសោភ័ណភាពរបស់ខ្លែងថាតើមានការតុបតែងល្អនិងត្រឹមត្រូវឬទេ?
ទី៣៖: គណះកម្មាការផ្តល់ពិន្ទុទៅលើសម្លេងរបស់ឯក (តើឯកណាមានសម្លេងល្អជាង)
ចំពោះការប្រកួតបង្ហើរខ្លែងឯក ចំណាត់ថ្នាក់លេខ១បានទៅលើខ្លែងឯកមកពីខេត្តកំពង់ឆ្នាំងដែលខ្លែងមានឈ្មោះ (ខ្លែងឯកក្រាំងលាវ) បង្ហើរដោយលោក សេង ហាន និង លោក ចាន់ ដារា។ រីឯចំណាត់លេខ២ បានទៅលើខ្លែងមកពីខេត្តរតនះគីរី ដែលខ្លែងមានឈ្មោះ(ខ្លែងឯករតនះមានជ័យ) បង្ហើរដោយលោក ញឹម ថន និងលោក ជា សឿន។ និងចំណាត់ថ្នាក់លេខ៣បានទៅលើ ខេត្តត្បូងឃ្មុំ ដែលខ្លែងមានឈ្មោះ (ខ្លែងឯកមហិទ្ធឬទ្ធិសែនជ័យបារមីត្បូងឃ្មុំ) បង្ហើរដោយលោក ជុ ភិន និង លោក ឃី ផល្លី។
រីឯប្រភេទខ្លែងស្វៃរិន ជាខ្លែងដែលមានការច្នៃប្រឌិតប្លែកៗ ចំណាត់ថ្នាក់ទី១ បានទៅលើខ្លែងកង់ របស់កញ្ញា រ័ត្ន បូរី អាយុ១៦ឆ្នាំ ជាសិស្សថ្នាក់ទី១១ នៃវិទ្យាល័យ ព្រះបាទជ័យវរ្ម័នទី៧ មកពីខេត្ត កណ្តាល៕
អត្ថបទដោយ: ផល ឧត្តម
